Minisitiri w’Intebe yasuye imishinga itandukanye mu Burengerazuba n’Amajyaruguru

Ku wa 22 Ugushyingo 2017 Nyakubahwa Ministiri w’Intebe, Dr. Edouard Ngirente yasuye imishinga itandukanye y’Ubuhinzi n’Ubworozi ndetse n’Uburezi hagamijwe kureba imikorere yayo n’uburyo yarushaho gukora neza.

 Mu Ntara y’Iburengerazuba yasuye Ikaragiro ry’amata rya Mukamira riherereye mu Karere ka Nyabihu. Yasuye kandi Uruganda rwa Mukamira rumaze imyaka hafi 3 rutangiye, rufite ubushobozi bwo gutunganya litilo ibihumbi 40 by’amata ku munsi, gusa kuri ubu rutunganya litiro ibihumbi 30.

Mu Ntara y’Amajyaruguru, Minisitiri w’Intebe yasuye Ishuri Rikuru ry’Imyuga rya Musanze (Musanze Polytechnic), asura ubwanikiro n’imirima y’amakoperative  y’abahinzi b’ibireti n’ibirayi akorera mu Karere ka Musanze. Muri aka Karere yasuye kandi Ikigo cya RAB gitubura imbuto z’ibirayi ndetse asura Green House ya SOPYRWA ituburirwamo ibirayi.  

Minisitiri w'Intebe mu ruzinduko rwe kandi yasuye uruganda rutunganya umusaruro w’ibireti rwa SOPYRWA hanyuma asoreza ku gusura ikusanyirizo ry'umusaruro w'ibirayi mu Murenge wa Rugarama, ho mu Karere ka Burera.

Muri uru ruzinduko, Minisitiri w’Intebe  yishimiye intambwe imaze guterwa muri iyi mishinga, ashimira abafatanyabikorwa bose babigiramo uruhare. Haganiriwe kandi ku buryo bwo kunoza imikorere y’ibikorwa byasuwe kugira ngo ishyirwa mu bikorwa ryabyo rirusheho kunoga.  

Muri uru ruzinduko Minisitiri w’Intebe yari aherekejwe na Minisitiri w’Ubuhinzi n’Ubworozi, Minisitiri w’Ubucuruzi n’Inganda na Minisitiri w’Imirimo y’Inama y’Abaminisitiri.